Son günlər Azərbaycanda bank kartlarına müdaxilələr olur. Hakerlər, dələduzlar müxtəlif üsullarla vətəndaşların vəsaitini ələ keçirir. Bu da ciddi narahatlıq, bəzi hallar ajiotaj yaradır. Artıq müştərilər bank xidmətindən istifadə məsələsində tərəddüd yaşayır. Əksəriyyət əmanətinin ələ keçirilə biləcəyindən narahatdır.

Yanvarın 27-də Kapital Bank-ın Birbank mobil tətbiqində də problem ortaya çıxdı. Müəyyən fasilələr yaranda. Bankdan verilən açıqlamada bildirilirdi ki, yaranan narahatlığın ən qısa zamanda həlli üçün çalışılır. Gecə saatlarında bank press-reliz yaydı. Bildirilirdi ki, problemin aradan qaldırılıb.

Xatırladaq ki, Milli Qəhrəman Hökümə Əliyevanın ailəsinə qarşı da ötən günlər dələduzluq olmuşdu. Onun atasına zəng edən dələduzlar bəzi məlumatları dəqiqləşdirdikdən sonra Kapital Bank-a məxsus kartdakı vəsaiti çəkə bilmişdilər. DİN işə qarışdıqdan sonra dələduzlar yaxalındı, vəsait ailəyə qaytarıldı.

Ölkədə bank sektoru ciddi təhdid altındadır? Nə baş verir?

Globalinfo.az-a danışan Milli Məclisin deputatı Vüqar Bayramov deyib ki, bank hesablarından vəsaitlərin oğurlanması qlobal problemdir:

“İnkişaf etmiş ölkələrdə daha innovativ hak metodu var. Azərbaycanda bank kartlarından vəsaitin oğurlanması hallarında diqqətçəkən məqam kart sahiblərinin məlumatsızlığı, kart məlumatlarının digər şəxslərə verilməsindən qaynaqlanır. Son hadisələrə baxdıqda kart sahibi dələduzların müraciəti zamanı öz kart məlumatlarını verdiyini görürük. Qanunvericiliyə əsasən bank müştərilərə zəng etmir. Müştəri banka zəng edən zaman xüsusi məlumatları almadan hansısa informasiya verilmir. Hansısa vətəndaşımıza bank adından zəng, SMS, link göndərilirsə, bu zaman kart məlumatları təqdim olunmamalıdır. Nəticədə belə oğurluq halları yaşanmaz. Vətəndaşlarımızın maarifləndirilməsinə çox ehtiyac var”.